LAOAG CITY – Inawagan a ‘moro-moro’ ni Human Rights Advocate Atty. Lorna Kapunan ti wagas a panangiggem ti Office of the Ombudsman ken Department of Justice (DOJ) ti kaso a malversation nga inpila kontra ken ni dati a Senador Ramon “Bong” Revilla Jr.
Inbatad ni Kapunan, madlaw a ginanat wenno inyal-alisto ken naglabsing iti due process ti alisto a panangiyisyu ti warrant of arrest kontra ken ni Revilla nga agarup maysa nga oras laeng ti nagbaetan kalpasan a naipatulod ti records ti kaso iti Third Division ti Sandiganbayan.
Inlawlawagna a makapadanag ti ipakpakita a wagas ti Ombudsman ken Department of Justice no sadinno a saanda a sursuroten ti linteg para iti political interest kadagiti sumagmamano laeng.
Kunana nga iti baet nga adda ti karebbengan ti prosecution iti panangduktal ti charges basar iti ebidensia, saan daytoy a nasken nga agbalin a rason tapno aglabsing iti karebbengan ti akusado nga ikalintegan ti bagina.
Innayon ni Kapunan a nalawagen ti tignay a maibilang a ‘railroading’ tapno insigida a maipatungpal ti warrant kontra ken ni Revilla.
