LAOAG CITY – Nakairekord manen ti Australia partikular iti amyanan a paset ti pagilian ti panagngato ti bilang dagiti matamtamaan ti Covid-19 nga omicron variant no sadinno a 75 nga indibidual ti makapkaptan ken maikabkabil iti ospital iti kada aldaw.
Basar iti surveillance data ti health department iti Australia, mapagam-amkan nga ad-adda pay a ngumato ti kaso ti covid-19 iti holiday season ken ti dakkel a pakaseknan ti pagilian ket ti bilang dagiti health workers no kumaro ti sitwasyon.
Gapu iti daytoy, inbalakad dagiti otoridad a kanayun nga agsuot ti facemask kadagiti pampubliko a lugar ken no adda ti sakit ket agtalinaed laengen iti uneg ti pagtaengan.
Magutgutigot pay ti publiko nga ag-‘self-isolate’ no makapaspasar kadagiti mild symptoms.
Kabayatanna, ginutigot ti health department ti Australia ti publiko nga agpa- booster shot dagiti agtawen ti 64 agingga iti 74 iti kada 12 a bolan adda man wenno awan ti nakana a sakit da.
