LAOAG CITY – Addan ti pakabuklan a 2,177 ti kaso ti leptospirosis iti pagilian manipod Enero 4 agingga iti Hunyo 6, 2026.
Segun iti Department of Health, manipod iti nasao a bilang ket kaadoan kadagiti nakaptan ti nasao a sakit ket dagiti mannalon gapu ta isuda ti kanayun a maiyuper kadagiti danom iti kataltalonan.
Kuna pay ti ahensya a nangatngato ti kaso iti innem a porsiento no ikompara iti isu metlaeng a panawen idi 2025.
Inlawlawag ti ahensya a ti leptospirosis ket bacterial disease a maala babaen iti pannakaiyuper ti saka ti danom nga addaan ti isbo ti nagduduma nga animal kangrunaan na ti bao.
Inbalakad ti Department of Health a tapno maliklikan ket masapol a saan nga iyuper ti saka nga addaan ti sugat, ken bugwan ken sabonan a dagus ti saka iti nadalos a danom apaman a sumangpet iti balay ken agturong laeng kadagiti health facilities tapno maipaayan ti agas.
Nagballaag pay ti ahensya a saan nga uminom ti antibiotic wenno aniaman nga agas nga awan ti reseta ti doktor.
