LAOAG CITY – Naikeddeng nga aglukat manen ti border ti Kenya ken Somalia intono Abril ita a tawen kalpasan ti agarop 15 a tawen.
Daytoy ti inrakurak ni Kenyan President William Ruto.
Maipalagip a napaserraan ti border ti dua a pagilian kalpasan dagiti iraraot ti Islamist militant group nga al-Shabab. Basar iti Somalia, ti nasao a grupo ti adda iti likudan dagiti napaspasamak a nadara a panagraot idiay Kenya pakairamanan ti maysa a shopping centre iti ciudad ti Nairobi, a nakatayan ti 67 a tattao idi 2013 ken kasta pay iti maysa nga unibersidad iti Garissa a nakatayan ti 148 nga indibidual, addan dua a tawen ti napalabas.
Ti nasao a plano ket immunan a naiwaragawag idi 2023, ngem gapu kadagiti nagsasaruno a panagatake ket naitantan ti pannakaipatungpal na.
Inpasigurado ni Ruto nga agnayun da kadagiti security forces nga agbantay iti border da iti Somalia tapnoasigurado ti seguridad iti nadakamat a lugar.
