LAOAG CITY – Inlawlawag ni Engr. Ma. Theresa Bacnat, OIC iti Provincial Agriculture Office ditoy Ilocos Norte ti inrubwat a programa ti gobierno probinsyal a napaulwan ti “AGRI KA DITO”.
Inbatad ni Bacnat a babaen ti nasao a programa ket al-alisto ti pannakaipaay ti serbisyo para kadagiti mangngalap ken mannalon ditoy probinsya.
Segun kenkuana, ado dagiti serbisyo a mabalin a gundawayan dagiti maseknan.
Inpakaammo ni Bacnat a sipud inrubwat da ti programa, addan maysa a bolan ti napalabas ket nakaawat dan ti nasurok a 700 a requests manipod kadagiti mannalon ken mangngalap ditoy probinsya.
Innayon na a ti panagkiddaw ti tulong dagiti maseknan ket mabalin da nga idanun babaen ti panagtext, panagtawag wenno agsurat dagitoy a maiturong iti Provincial Agriculture Office.
Kaadoan a kiniddaw dagiti mannalon ken mangngalap ket dagiti vegetable seeds, abono, pesticides, feeds, fingerlings ken dadduma pay no sadinno a naited a dagus kadakuada iti uneg laeng ti dua a lawas.
