LAOAG CITY – Kalikagom ni Konsehal Bryan Alcid nga adda ti naka-standby nga ambulansya iti Ilocos Norte National High School ditoy ciudad ti Laoag.
Maipalagip nga iti napalabas a tawen ket nagkiddaw ti nasao a pagadalan ti ambulansya iti opisina ni Ilocos Norte 1st District Representative Sandro Marcos.
Daytoy ket gapu ta iti kastoy a bolan iti napalabas a tawen ket ado dagiti estudyante iti nadakamat a pagadalan a napukawan ti poot gapu iti kinabara ti panawen.
Nupay kasta, saan a napatgan ti kiddaw ti nasao a pagadalan gapu ta adda dagiti ili nga ad-adda a naiprayoridad a naipaayan ti ambulansya.
Gapu iti daytoy, kalikagom ni Konsehal Alcid nga adda ti temporaryo paylaeng a mausar nga ambulansya nga ag-standby iti Ilocos Norte National High School tapno adda ti dagus a mausar no adda dagiti estudyante a matalimudaw wenno maaddaan ti problema iti salun-at gapu iti kinabara ti panawen.
