LAOAG CITY – Naglikudan ni Barangay Kagawad Derick Nicolas ti alegasion a maipagarup a pagiinomanda iti Barangay Hall ti Brgy. Tangid ditoy siudad ti Laoag.
Daytoy ket kalpasan nga adda ti naawat a reklamo ti Bombo Radyo Laoag a masansan a pagiinomanda ti Barangay Hall pakairamanan dagiti menor de edad.
Inlawlawag ni Konsehal Nicolas a dayta nga aldaw ket nairana nga agkasangay isuna rason nga adda met dagiti pagayamna a nangisagut ti arak ngem saanda a linuktan dagitoy.
Mainaig iti daytoy, inpalgakna nga awan ti kinapudnona iti rumrummuar a damag a maipagarup a nobiana ti Kapitana Venaida Anacleto Rivera iti barangayda.
Kunana nga amin dagitoy nga alegasion a maibatbato kenkuana ket pammerperdi laeng iti publiko.
Inpettengna kas maysa nga opisial ti barangay ket ammoda iti ar-aramidenda para iti pagsayaatan ti bukudda a lugar.
Innayonna a nakasagana isuna a sungbatan dagitoy a banag babaen iti panagsasangoda iti barangay hall.
