LAOAG CITY – Kinumpirmaran ni Barangay Chairwoman Vicitacion Cabusas iti Barangay Durepes iti ili ti Bacarra a saan a nairaman ti maysa a lakay a benepisyaryo ti Social Amelioration Program (SAP) iti nasao a barangay.
Inlawlawag na nga idi nagilista da ti benepisyaryo ti SAP ket inraman da ti nagan ni lolo Benigno Maneja, agtawen ti 70 gapu ta nakarigrigat ti panagbiag na.
Nupay kasta, adda dagiti inparuk-at a guidelines ti DSWD a dagiti social pensioner ket saan a mabalin nga iraman iti SAP.
Segun ken ni Cabusas, maysa a social pensioner ni Maneja isut gapuna a saan a nakapasa iti DSWD iti baet nga agmaymaysan nga agbibiag ken narigat pay ti kasasaad na.
Naamoan a kas maysa a social pensioner ket agaw-awat ni Maneja ti 500 a pisos iti kada bolan.
Inpakaammo ti kapitana nga amin nga ayuda ti barangay ket ni Maneja ti numero uno a kangrunaan a maik-ikkan.
Innayon na a kalpasan a naamoan dagiti kabagyan ti lakay nga adda idiay abroad ti kasasaad na ket mangrugi da metten a mangipaay ti tulong.
Kabayatanna, itay met laeng bigat ket naipakaammo iti Bombo Radyo Laoag a nairaman met laeng ti nagan ti lakay a benepisyaryo ti SAP.
