LAOAG CITY – Nakagun-od ti world record ti maysa a lalaki idiay Pennsylvania, U.S.A. kalpasan a naaramidna ti kangatoan a kallugong iti intero a lubong.
Kinumpirmaran ti records keeping organization a Guinness World Records a ni Joshua Kiser ti baro a record holder ti titulo a “World’s Tallest Hat” kalpasan a nakaaramid isuna ti kallugong nga adda ti kangatona a 17 feet ken 9.5 inches.
Inbatad ni Kiser, tawen 2020 idi planoenna a makaaramid ti kangatoan a kallugong gapu ta inpagarupna nga alisto laeng daytoy nga aramiden.
Kangitingitan idi COVID-19 pandemic ken karikrikep laeng ti nagserrekanna a kolehio idi napanunutanna nga artapan ti previous record daytoy a 15 feet ken 9 inches.
Naammoan a kalpasan ti uppat a tawen, nabukel ni Kiser ti kallugong babaen iti napagtitipon a tubo ti alulod a naaramid iti aluminum.
Kabayatanna, ti pakabuklan ti kallugong ni Kiser ket adda ti kadagsenna nga 11.9 kilograms.
