LAOAG CITY – Napilaan ti maysa a lalaki ti kaso a direct assault ken nairekomendar ti 36 a ribo a pisos a pyansa para ti temporaryo a pannakawaya-waya na.
Nabigbig ti akusado a ni Dennis Rumbaoa, agtawen ti 38, naasawaan, maysa a mannalon, ken residente iti Brgy. Nagpatpatan iti ili ti Solsona.
Naipila ti kaso iti MCTC iti Piddig-Solsona-Carasi iti ili ti Piddig.
Nagtalinaed ni Rumbaoa iti Mariano Marcos Memorial Hospital and Medical Center iti siudad ti Batac kalpasan a napaltogan babaen dagiti nagresponde a kameng ti PNP Solsona.
Immuna iti daytoy, napasamak ti komosyon iti pagtaengan da gapu ta kaap-apa na ti asawa na ken nakaiggem ti kutsilyo ti suspek.
Idi nakapagresponde dagiti otoridad tapno anawaen da ni Rumbaoa ket gandaten na a bagkongen ni Police Staff Sgt. Mateo ngem pinaltogan na ti suspek usar ti nakaisyu kenkuana nga M16 Armalite.
