LAOAG CITY – Maysa a lalaki idiay Idaho, United States ti nakagun-od ti world record gapu iti kinaalistona nga agisuot ti 10 T-shirts iti uneg laeng ti 15.03 seconds.
Kinumpirmaran ti records keeping organization a Guinness World Record a naala ni David Rush ti titulo a “Fastest Time to Put On 10 T-shirts” kalpasan ti kinaalistona ti agisuot ti 10 T-shirts.
Saan daytoy ti umuna a daras ni Rush a makaawat ti world record title. Idi 2020, immunana a nagun-od ti titulo iti record time a 15.63 seconds.
Ni Rush ket maysa nga electrical engineer. Nakairekord daytoy ti 250 Guinness World Record titles. Ar-aramidenna daytoy tapno itandudo kadagiti agtutubo ti Science, Technology, Engineering and Mathematics (STEM) education.
Ti gagem ni Rush ket makagun-od ti titulo a “Most Concurrent Guinness World Record titles.”
Iti agdama, ti record holder daytoy ket ni Silvio Sabba ti Italy nga addaan ti 182 current unbeatable titles idinto a ni Rush ket addaan laeng ti 162.
