LAOAG CITY – Natiliw ti maysa a lalaki iti naiwayat a drug buy bust operation babaen ti Philippine Drug Enforcement Unit iti ili a Solsona.
Nabigbig ti subject ti operasyon a ni Marshall Fariñas, agtawen ti 46, naasawaan ken residente iti Brgy. 4 San Bartolome iti ili a San Nicolas.
Basar iti imbestigasyon, natiliw ni Fariñas kalpasan a nalakuan na ti maysa a pulis a nagpammarang a gumatang ti maipawil a droga nga agbalor iti sangaribo a pisos.
Malaksid iti dayta, narekobre pay kenkuana iti 5 a sachet a naglaon iti maatap a shabu nga agdagup iti 32 ribo a pisos.
Naamoan a drug surrenderer ti suspek iti PNP Solsona idi Hulyo 13, 2016, addaan iti dati a kaso a panaglabsing iti RA 9165 idi tawen 2014 iti PNP Laoag ken adda iti priority watchlist ti Ilocos Norte Police Provincial Office.
