LAOAG CITY – Maysa a lalaki idiay Virginia, U.S.A. ti nakagun-od ti world record gapu iti rinibu a koleksionna ti Funko Pop.
Kinumpirmaran ti records keeping organization a Guinness World Records a ni Paul Scardino ti baro nga akin-iggem ti world record title a “Largest Collection of Funko Pop! Figurines.”
Daytoy ket kalpasan a nakakolektar isuna a dumanon iti 8,002 a pedaso.
Ti Funko Pop ket maysa a collectible toys a naaramid iti kompania a Funko. Am-ammo ti Funko Pop figures iti distinct-da a disenio no sadinno a dadakkel ti ulo dagitoy nga addaan ti simple a detalye ti rupa ken bassit a bagi.
Naammoan a dagitoy ket masansan a basar kadagiti karakter manipud iti pelikula, TV shows, video games ken komiks.
Gapu iti panagbalin a collectible, adu ti agkolkolektar kadagiti nagduduma a bersion dagiti Funko Pop nga iparparuk-at nangruna kadagiti limited edition.
Inbatad ni Paul, ti panagkolektarna ti Funko Pop ket makatulong iti mental health.
Kunana a daytoy ket maysa a wagas tapno maaddaan ti social life iti babaen ti pannakilangen-langen kadagiti dadduma pay a Funko Pop collectors.
