LAOAG CITY – Inadmitir ni Dr. Yolanda de Silva, administrador iti Laoag City General Hospital (LCGH) nga awan ti Intensive Care Unit (ICU) ti nasao nga ospital iti agdama.
Inlawlawag na nga adda ti nagleak iti oxygen lines nga agturong iti ICU isut gapuna a napaserraan ken daytoy ket napasamak pay laeng sakbay a nagtugaw kas mangidaulo iti nasao nga ospital.
Inbaga na nga iti panagtugaw na kas mangidaulo iti LCGH ket ikarkarigatan da a maisubli ti operasyon ti ICU iti nasao nga ospital ngem saan a kaskari na isut gapuna nga immapela iti naan-anay a pannakaawat dagiti tattao.
Inpakaammo pay ni Doctora de Silva a gapu iti pandemya ket naglukat da ti covid ward ken isolation room iti LCGH nga isu ti kangrunaan na nga inprayoridad da no sadinno a dagiti dadduma a nurses iti nasao nga ospital ket isu ti naikabil.
Kuna na a ti panagkurkurang ti staff kangrunaan na dagiti nurses ti maysa pay a nagbalin a problema da iti nasao nga ospital.
Innayon na a no malukatan manen ti ICU ket kasapulan da ti sumagmamano a nurses gapu ta saan a mabalin a dagiti met laeng naka-assign iti covid ward ken isolation room iti LCGH.
Inpakaammo na nga iti agdama ket hiring da kadagiti mayat nga agaplikar a nurse iti LCGH ngem saan a basta agawat da gapu ta adda ti sursuruten da a proseso.
Kabayatanna, inbaga ni de Silva a no adda ti pasyente da a kasapulan na ti maipan iti ICU ket ikoordinar da a dagus iti sabali nga ospital.
Sungbat daytoy ni Doctora de Silva kalpasan nga adda ti naidanun nga impormasyon kenni Sang Panlungsod Member Jason Perera ditoy ciudad ti Laoag mainaig iti kaawan ti ICU iti LCGH nga isu ti rason nga adda lattan dagiti matmatay iti balay da kangrunaan na iti panagngato ti kaso ti covid-19 ditoy probinsya.
Inpasigurado ni de Silva nga aglukat ti ICU iti LCGH iti kabiitan a panawen.
