LAOAG CITY – Inpakaammo ni Dr. Rufino Cravalhu, Municipal Veterinary Officer iti ili ti Bacarra a naiget a maipatungpal ti pannakaipawil ti pannakaiserrek kadagiti baboy nga aggapu iti sabali nga ili inton maikatlo a lawas ita a bulan ti Marso.
Segun kenkuana, basar iti kaudian nga hog population survey nga aggapu kadagiti barangay ket adda ti sumurok 800 a baboy a mabalinton a maparti iti slaughter house iti iti ili ti Bacarra.
Inlawlawagna kadagiti umili a masapol nga adda ti maipakita a sertipikasion manipud iti Barangay sakbay a maiserrek iti slaughter house.
Mainaig iti daytoy, nagpanawagan ni Dr. Cravalhu a masapol a sumurot dagiti partidor ti immunan a napagsasaritaanda tapno saanda a mamulta ken masuspenso iti panaglako dagitoy.
Innayonna a babaen iti daytoy nga addang nga ipatungpalda ket maysa a wagas tapno maprebentaranda ti African Swine Fever wenno ASF virus.
Kabayatanna, nagtalinaed ti presio ti baboy kas ti karne a 280 a pisos iti kada kilo idinto ti live weight ket dumanon iti 180 a pisos iti kada kilo ti agdagsen ti 100 a kilo ken agpangato.
Maipalagip a temporario nga inikkatda ti restriction iti pannakaiserrek dagiti taraken a baboy babaen met laeng ti napagnunumoan dagiti partidor iti nasao nga ili.
