LAOAG CITY – Naragsak nga inpakaammo ni Mayor Richard Degala a ti lokal a gobierno iti ili ti Vintar ti kaunaan a nangirubuat ti Convergence Area Development Program iti intero a rehion uno.
Segun kenkuana, saanda a nagun-od daytoy a balligi no awan ti tulong manipud iti gobierno probinsial ken dagiti national agencies.
Inbatadna a daytoy ti kangrunaan a proyekto ti lokal a gobierno iti ili ti Vintar inton sumaruno a tawen no sadinno a maestablisar ti multiplier farm iti nagbaetan ti Barangay Salsalamagui ken Barangay Alsem iti nasao nga ili.
Kunana a babaen iti daytoy ket ditoy a maipatungpal ti livestock production, fingerlings, panagmula ti organic farming ken adda pay ti maipatakder a Farmers Training Center tapno maisuro dagiti rumbeng nga aramiden dagiti mannalon iti panagtalon.
Inpettengna a kasapulan pay dagiti nagduduma a makinaria para iti al-alisto a panagtalon dagiti mannalon.
Mainaig iti daytoy, kalikagum pay ni Mayor Degala a maisuro ti baro a wagas ti panagtalon dagiti young farmers wenno dagiti agtutubo a mannalon.
Innayonna a babaen ti pannakaestablisar ti multiplier farm ket addanto dagiti maidiaya kadagiti farm to table a restaurant.
