Liga ng mga Barangay Pres. Ablan, inimbitaranna dagiti residente a makipaset para iti Sustainable Livelihood Program

LAOAG CITY – Inimbitaran ni Liga ng mga Barangay President Rbee Ablan dagiti residente manipod kadagiti nagduduma a barangay ditoy siudad ti Laoag.

Segun kenkuana, daytoy ket tapno maipakaammo kadakuada ti Sustainable Livelihood Program.

Inbatadna a naawis dagiti miembro ti Pantawid Pamilyang Pilipino Program ken Listahanan ti Department of Social Welfare and Development pakairamanan dagiti maibilang nga indigent a residente.

Inlawlawagna a ti nasao a programa ket tapno makaala dagitoy ti 15 a ribu a pisos iti tunggal maysa no kalikagumda a mangrugi ti negosio wenno nayon a puunan para iti negosioda.

Kunana daytoy a programa ket babaen iti opisina ni Ilocos Norte 1^st District Representative Sandro Marcos ken iti kooperasion ti Department of Social Welfare and Development.