LAOAG CITY – Inrubuat ti gobierno siudad ti San Juan iti panangidaulo ni Mayor Francis Zamora ti “Ligtas Tigdas” campaign kas paset ti World Immunization Week 2026 iti pannakikammayet ti Department of Health (DOH) ken maiyataday iti Immunization Agenda 2030 ti World Health Organization (WHO).
Gagem ti inisyatiba a mapalawa ti access iti bakuna, papigsaen ti talek ti publiko iti immunization ken protektaran dagiti ubbing ken dadduma pay a vulnerable sectors iti babaen ti tema a “For Every Generation, Vaccines Work.”
Iti aktibidad, makita a nagpila dagiti nagannak kaduada dagiti annakda tapno makaala ti libre bakuna.
Daytoy ket paset ti agtultuloy a kampania ti lokal a gobierno tapno mapapigsa ti immunization coverage ken maliklikan dagiti sakit a mabalin a malappedan iti babaen ti bakuna.
