LAOAG CITY – Natiliw dagiti lima nga indibidwal gapo iti iligal a panagpapallot da iti paset ti Barangay 16, Sto. Santiago iti ili ti Sarrat partikular iti sirok ti kaykayo.
Segun kenni Police Master Sergeant Meynard Buguina iti PNP-Sarrat ken imbestigador iti kaso, malaksid kadagiti lima a natiliw da ket adda pay dagiti nakataray.
Kinumpirmaran met ni Buguina a maysa kadagiti natiliw nga iligal a nagpapallot ket Barangay Kagawad iti Barangay 17 iti nadakamat met laeng nga ili.
Inbatad na a naaktuan da ti panagpapallot nga insayangkat dagiti natiliw ken naamoan a nabayagen a masipsiputan daytoy.
Nakumpiskar dagiti otoridad ti uppat a sibibiag a manok ken uppat a natay a manok, bag a naglaon ti pagtadi ken nasurok walo ribo a pisos a pusta.
Manamnama met a sumango dagiti indibidwal ti kaso.
Kabayatanna, kuna ni Barangay Kagawad Lordelito Arnel Hernandez iti Barangay 16 a ti maysa kadagiti natiliw ket kabarangayan na idinto a dua ti taga Barangay 15 ken dua met iti Barangay 17.
Binigbig met ni Hernandez ti opisyal ti barangay a natiliw a ni Barangay Kagawad Jolmar Agnir ken maysa a negosyante.
Kunana a daytoy met laeng ti ammo nga ummuna a gundaway a natiliw ni Agnir ken nasdaaw gapo ta karaman a natiliw nupay ammo na a saan a maipalubos ti panagpapallot.
