LAOAG CITY – Naiget nga ipatungpal ti Gobierno Probinsial ti Ilocos Norte a masapol nga adda ti madutukan a lifeguard nga ag-duty kadagiti local lodging facilities nga addaan ti swimming pool ken kadagiti beach resort.
Segun ken ni Sangguniang Panlalawigan Member Dr. Medeldorf Gaoat, ti Chairman ti Committee on Health, babaen iti daytoy nga addang ti gobierno probinsial ket adda ti agbantay kadagiti ubbing nga agtawen ti 10 ken agpababa a mangimandar nga agisuot dagitoy ti life vest no agdigosda.
Inbatadna a daytoy ket maysa kadagiti kangrunaan a requirement kas paset iti pannakarebisar ti Tourism Code ditoy probinsia.
Inlawlawagna kas paset pay ti baro a pagannurutan ket nasken a maipadalan iti panagsanay dagiti watchers wenno first aid responders kadagiti karayan, creeks, dams ken dadduma pay a recreational facilities.
Mainaig iti daytoy, indauloan ni Health Undersecretary Maria Rosario Vergeire ti naiyuswat a briefing iti Teatro Ilocandia iti siudad ti Batac iti pannakaitandudo ti drowning free communities babaen ti intensified education ken awareness drive.
Naammoan a maibasar iti Provincial Health Office ket adda ti 27 a pimmusay ditoy probinsia gapu iti pannakalmes idi tawen 2023.
Inpakaammo met ni Lt. Joseph Christian Sagun, ti mangidadaulo iti Philippine Coast Guard – Ilocos Norte a masapol a paigetanda pay ti panangisayangkatda ti baywatch patrol tapno maitandudo ti public safety.
Innayonna a napintas ti pannakaiyuswat ti basic life support training para iti village peace keeping officers.
Kabayatannna, nangi-deploy met ti Ilocos Norte Police Provincial Office dagiti pulis a maidesignar kadagiti nagduduma a tourist destinations ditoy probinsia.
Immuna iti daytoy, natay ti apoko ni Bokal Gaoat kalpasan a nalmes daytoy nga awan ti nakabantay a lifeguard.
