LAOAG CITY – Immapela ni Mr. Franklin Raguindin iti Barangay Gaang iti ili ti Currimao a parwaren koman ti Ranada General Hospital ti apoko na tapno saanen a manayunan ti bill da.
Segun ken ni Raguindin, umaboten iti 254 a ribo a pisos ti bayadan da iti ospital gapu iti pannakaopera ti ulo ti apoko na nga agtawen ti pito a lalaki.
Inlawlawag na a nadaraan ti utek ti apoko na kalpasan a natennag iti kinalkalangtay da a galba kadagiti pada na nga ubbing.
Naamoan a nairekomendar nga iti Ranada Hospital ti pagturungan da gapu ta isu ti ayan ti doctor nga specialist iti utek.
Kalikagom ti pamilya ti ubing a parwaren da koma lattan ti pasyente ken in-inuten da a bayadan ti bill da ngem saan nga immanugot ti nasao nga ospital.
Inpalgak ni Raguindin a no saan paylaeng a makarwar ti apoko na ket adda ti posibilidad na a manayunan pay ti bill da iti ospital.
Mainaig iti daytoy, nagpanawagan ni Raguindin kadagiti naayat ti panagpuspuso na a tumulong iti bayadan da iti ospital.
Innayon na nga adda da metten nangipaay ti tulong na ngem saan paylaeng a makaumanay gapu iti kadakkel ti bill da.
