LAOAG CITY – Inpakaammo ni Laoag City Mayor James Bryan Alcid a malukatanen iti publiko intono bigat, Oktubre 19 ti Love Lock Bridge a masarakan iti Brgy. La Paz ditoy siudad.
Kunana a sakbay ti opisial a panaglukat iti nasao a rangtay ket urnosen pay ti lokal a gobierno dagiti kasapulan nga addang tapno maipasigurado iti seguridad dagiti bumisita ken panangsalimetmet iti kinadalus ti aglawlaw.
Mainaig iti daytoy, makikoordinar ti siudad kadagiti opisiales ti barangay ken kadagiti interesado nga aglako iti lugar tapno maurnos dagiti kasapulan sakbay a malukatan iti publiko.
Inlawlawag pay ti mayor a masapul a kontrolenda ti bilang dagiti tao a mabalin a nga agturong iti nasao a rangtay tapno masigurado ti kinatalged dagiti tattao nga agturong iti lugar.
Segun kenkuana, na-survey ti Department of Public Works and Highways wenno DPWH ti bridge, ngem adda latta limitasyon iti bilang dagiti tattao a mabalin a mapan iti lugar.
Inbatadna a saan a nasursurok ngem 200 a tao ti mabalin nga agtalinaed iti rangtay, maibasar iti resulta ti survey.
Gapu iti daytoy, immapela ni Mayor Alcid kadagiti tattao a kayatna ti bumisita iti lugar nga aganus ken makikooperar kadagiti pagannurotan para iti seguridad ti publiko iti Love Lock Bridge.
