LAOAG CITY – Nakastreken iti Philippine Area of Responsibility (PAR) ti low pressure area (LPA) a naudi a nasaripatpatan iti kaadayo a 1040 a kilometro iti daya a paset ti Luzon.
Inbatad ni Aldczar Aurelio, weather specialist ti Philippine Atmospheric, Geophysical and Astronomical Services Administration wenno PAGASA a nababa ti tsansa nga agbalin a maysa a bagyo ti nasao a low pressure area ken awan pay ti direct impact iti pagilian.
Inlawlawagna a ti mangituntunda ti panagtudo iti Luzon partikular iti Benguet, La Union, Pangasinan, Zambales Bataan pakairamanan iti Metro Manila, Ilocos Sur, Abra, Tarlac, Pampanga, Bulacan, Rizal, Cavite, Batangas ken Occidental Mindoro ket gapu iti epekto ti Habagat.
Kuna ni Aurelio a ti weather system ket agtultuloy a mangitunda ti panagtudo iti Luzon ken iti western section ti Visayas agingga iti sumaruno a lima nga aldaw.
Naammoan a ti Palawan, nabatbati a paset ti Visayas ken iti intero a Mindanao ket makapasar ti nasayaat a kasasaad ti panawen malaksid laeng ti sagpaminsa a panagtudo gapu iti local thunderstorm.
