LAOAG CITY – Manamnama a malpas ti maikadua a viaduct iti ili ti Pagudpud inton maudi a paset ti 2026 wenno katengngaan ti 2027.
Segun ken ni Ilocos Norte 1st District Rep. Sandro Marcos, adda ti pannakaitantan ti nasao a proyekto gapu ta dakkel ti nagbalin nga epekto ti panagtudtudona gubuay iti nagsasaruno a bagyo a pinapigsa pay ti angin abagat.
Inbatadna a nalpasen ti Phase 1 ken Phase 2 idinto a manarimaan pay laeng ti Phase 3 ken Phase 4 ti nasao a proyekto.
Mainaig iti daytoy, inpakaammo ni Cong. Marcos nga adda ti inpakita ni Mayor Rafael Benemerito a masterplan kadagiti development projects iti ili ti Pagudpud.
Innayonna a masapul nga adalenna pay laeng amin dagitoy sakbay ti naan-anay a pannakaipatungpalna.
Maipalagip a naipatungpal ti nasao a proyekto gapu iti masansan a panagreggaay ti daga iti Barangay Pancian iti ili ti Pagudpud nangruna iti panawen ti panagtutudo.
