LAOAG CITY – Mangiyuswat ti Provincial Government of Ilocos Norte iti pannakitinnulong ti Ikani Surf Resort, Zephyr Café, Smart Communications ken Philippine Airlines iti maikapat nga edision ti “B-Town Boogie,” a mangidiaya iti ad-adu nga aktibidad ken ad-adu pay a makapagagar a kompetision kadagiti managayat iti surfing iti Ikani Surf Resort iti ili ti Pagudpud.
Makisalip dagiti makipaset iti nasao nga event a buklen dagiti surfers manipud iti intero a pagilian iti nagdumaduma a kategoria iti men and women longboard open, men and women shortboard open, junior groms mixed shortboard open ken beginners with caddie.
Malaksid kadagiti pasalip iti surfing, mangidiaya pay ti nasao nga aktibidad kadagiti nagdumaduma nga aktibidad kas ti sunrise yoga, Pilates class, art and photo exhibit, dirty derby moto games, fun race, B-Town Boogie Fiesta, ken dadduma pay.
Naiyuswat ti immuna a B-Town Boogie idi 2021 a nangrugi kas bassit a kompetision para kadagiti lokal a surfers iti ili ti Pagudpud.
Kalpasan ti naballigi nga inagurasionna, kinalikaguman dagiti nangorganisar iti nasao nga aktibidad a pasayaaten ti pannakaisayangkat ti nasao nga aktibidad babaen iti umno a judging, heat scheduling ken priority system.
Idi 2023, ti B-Town Boogie a manipud iti panagbalin a lokal a kompetision ti panag-surf agingga iti maysa a nailian nga imbitasion nga event.
Nagun-odna ti atension ti nasional a komunidad ti surfing, ket nakikadua iti kompetision dagiti surfer manipud kadagiti kangrunaan a surf spot iti pagilian kas idiay Siargao, Baler, Zambales ken La Union.
Daytoy a tinawen a pasalip iti surfing ket agtalinaed a libre ken silulukat kadagiti interesado a managayat iti surfing.
Naammoan a manamnama a mangsangaili ti Ilocos Norte iti masungad a maika-65 nga edision ti Palarong Pambansa inton 2025.
