LAOAG CITY – Inpakaammo ni Vice Mayor Maynard Francis Bumanglag iti ili ti Pinili a dagiti presio ti tabako ket kontrolado iti National Tobacco Administration.
Daytoy ket iti baet dagiti sayangguseng nga adda ti panagbaba ti presio iti tabako iti probinsia gapu iti sobra a suplay.
Segun ken ni Bumanglag, nagduduma ti presio ti tabako aglalo no ti maysa a mannalon ket miembro iti organisasion.
Nupay kasta, kunana nga ikarigatanda nga ipaayan dagiti mannalon ti suporta wenno assistance tapno saan dagitoy a madagsenan iti panaggastoda iti panagtalonda.
Maipalagip nga iti ili ti Pinili ket kaadoan kadagiti mannalon nga agmulmula ti tabako ditoy probinsia.
Kabayatanna, inpasigurado ni Vice Mayor Bumanglag iti agtultuloy a suportada kadagiti mannalon ken dagiti amin nga umili iti nasao nga ili.
