LAOAG CITY – Natay ti maysa a maintenance personnel ti Department of Public Works and Highways kalpasan ti napasamak a panagreggaay ti daga iti Barangay San Juan idiay Sta. Praxedes, Cagayan.
Nabigbig ti biktima a ni Enrico Danzan, agtawen ti 48, residente ti Barangay Capacoan, Sta. Praxedes, Cagayan idinto a dagiti tallo a kaduana ket nabigbig nga isuda Romeo Lumabao, Hadjie Castillo ken Darwin Martinez.
Segun ken ni P/Capt. Andy Delos Santos, Hepe ti Sta. Praxedes Municipal Police Station idiay Cagayan, manarimaan ti panagpala dagiti uppat nga indibidual iti drainage canal iti igid ti kalsada gapu ta adda ti naigabur a daga a nakaabbeng iti pagayusan ti danum idi a kellaat a nagreggaay ti daga iti bantay a nangitunda ti pannakagabur ti biktima.
Kunana a naitaray iti ospital ti biktima ngem naideklarar a dead on arrival.
Inbatadna a dagiti tallo a kadua ti biktima ket nakataray ngem nagsagaba ti sugat ti ima ti maysa kadakuada a ni Romeo.
Mainaig iti daytoy, inpakaammo ni P/Capt. Delos Santos nga adda dagiti sumagmamano a motorista ti na-stranded gapu iti landslide ken napigsa a tudo iti agturong iti Manila North Road ditoy Ilocos Norte.
Naammoan nga iti oras ti 12:30 ti pangaldaw ita nga aldaw ket one lane passable ti kalsada para kadagiti motorista ngem iti oras ti 5:15 ti malem ket naan-anayen a nawaknitan ti sibubukel a kalsada.
Innayonna nga addan dagiti napasaran dagiti residente a landslide ngem daytoy ti ibilangda a kakaroan iti amin a napasamak.
