LAOAG CITY – Inpetteng ni Mr. Jonathan Salvador, maysa a tricycle driver ditoy siudad ti Laoag a masapol a mabalanse ti maipatungpal a plete para kadagiti pasahero ken ti sitwasyon dagiti tricyle driver nangruna iti baet ti agtultuloy a panagngato ti presyo dagiti produkto a petrolyo.
Kuna ni Salvador a basar iti ordinansa a masursurot iti agdama ket 20 a pisos pay laeng ti masapol a singir iti plete ken adda ti nayun a dua a pisos iti tunggal sobra a maysa a kilometro.
Inbatad na a daytoy ket naiparuk-at idi Mayo 2020 ken awan pay ti napabaro a fare guide a nasken a masurot.
Mainaig iti daytoy, inbunannag na a kas maysa a tricycle driver ket saan a makaumanay ti apela ti kaaduan a maisubli ti 11 a pisos a minimum a plete gapu ta dakkel ti pukaw dagiti drivers.
Innayun na a mabalin nga ado pay dagiti agsardeng nga agpasada nangruna ita a nangina ti presyo ti gasolina.
Kabayatanna, immunan nga inbatad ni Salvador nga adda ti responsibilidad ti maysa a tricycle a mangsurot kadagiti pagannurutan mainaig iti husto a singir ti plete ken dadduma a linteg trapiko.
Inadmitir na nga adda dagiti pada na a tricyle driver nga overloading kageddan ti panagsingir ti nangina a plete rason nga ado ti tumpuar a reklamo.
Nu pay kasta, inpetteng ni Salvador a ti kasapulan ket ti panagkikinnaawatan iti nagbaetan ti driver ken pasahero nangruna ti panangsurot iti pagalagadan.
