LAOAG CITY – Kinumpirmaran ni Barangay Kagawad George Calsada iti Barangay Bacsil North ditoy ciudad ti Laoag nga adda ti maladaga a nakita dagiti residente iti pagbasuran.
Segun kenni Calsada, ti nasao a lalaki a maladaga ket adda iti pagbasuraan iti likod ti maysa a pagtaengan ken asideg iti simbaan iti Sitio Dos.
Inbatad na nga idi naipadanon kenkuana ti impormasyon ket dagus a nagturong iti lugar ken presko pay laeng ti dara daytoy ken mabalin nga itay parbangon a maipagarop a naibelleng.
Kuna met ni Mr. Jimmy Ventura, nakita ti kayong ken kaanakan na ti maladaga iti 5:30 itay agsapa ken adda ti nakita da a dua a babbai a limmabas iti arubayan da.
Inlawlawag na a dagiti babbai ket naka-flashlight itay nakita na.
Atapen na nga iti nasao a lugar ti mabalin a nagpasngayan ti babai gapo iti kapresko ti dara ken adda ti nangeg na nga arig agkatkatawa iti dayta a gundaway.
Kabayatanna, dagus met laeng a naitabon ti bangkay ti nasao a maladaga iti lote ni Kagawad Calsada a maipagarop a saan a naipakada kenkuana ken iti laksid ti kalikagom dagiti residente nga iti kamposanto kuma ti pakaipanan daytoy.
