LAOAG CITY – Natay ti maysa a lakay kalpasan a nalmes iti Paoay Lake iti Barangay Nagbacalan iti ili ti Paoay.
Binigbig ni Police Major Eddie Suyat, ti chief of police iti ili ti Paoay ti biktima a ni Gaudencio Tabili y Galano, agtawen ti 75, mangngalap ken residente iti nadakamat a barangay.
Inbaga ni Suyat a basar iti imbestigador da, nagturong ti biktima iti Paoay Lake tapno akasen ti inpakat na nga iket ngem maipagarop a ditoy metten a natennag manipod iti nagluganan na a bangka a poon ti nakalmesan na.
Inpakaammo ni Suyat a kabayatan ti panagturong ni Karl Hallae Salvoso y Tabili, agtawen ti 18, mannalon ken residente iti sitio Talinaay iti met laeng nadakamat a barangay kadwa na ti kabsat na nga ubing iti lugar tapno mapanda iwarwar dagiti taraken da ket nakita da ti bangka nga awan ti tao na.
Gapu iti daytoy, inbilin ni Salvoso iti kabsat na a mapan na ibaga ti nakita da kadagiti nakaduty iti barangay checkpoints da.
Nagturong met a dagus iti Paoay Lake da Barangay Tanud Brgy. Tanod Dexter Buduan ken Nedie Lacro ket ditoy a nakita da ti biktima nga agtatapaw.
Inbaga ni Puyat a kalpasan a naipaigid da Buduan kn Lacro iti biktima ket intawag da daytoy RHU ken PNP.
Iti panagresponde ti PNP ken RHU iti lugar ket indeklarar ni Doctor Alfredo Domingo, ti Municipal Health Officer iti ili ti Paoay a pimmusayen ti biktima.
Inpakaammo ni Suyat a basar iti pamilya ti biktima ket kanayun da a pawilan nga agturong iti Paoay Lake ni Tabili gapu ta adda ti problema iti puso na ken adda dagiti gundaway nga agulaw.
Innayon na a mabalin nga iti kaadda na iti Paoay Lake ket nagulaw a nangitunda ti pannakatennag na iti bangka a poon metten ti pannakalmes ken pannakatay na.
