LAOAG CITY – Inpakaammo ni Police Major Joseph Tayaban, hepe ti PNP Badoc, a mistaken identity ti pannakapaltog ti biktima a maysa a mannalon iti Sitio Sucoc, Brgy. Caraitan iti nasao nga ili.
Inlawlawag ni Tayaban, basar iti pagdurdur-asan ti imbestigasyon, napan laeng kinita ti biktima ti nakagalot a nuang na gapu iti panagtaugood dagiti aso iti ta nasilawan na dagiti suspek.
Gapu iti daytoy, pinaltogan dagiti suspek ti biktima ngem dagus met a nagpakleb daytoy.
Maipagarup a gun for hire dagiti uppat a saan pay a mabigbig a suspek.
Inbatad ni Tayaban a ti possible a puntirya dagiti suspek ket ti pannakaama ti biktima a maysa nga opisyal ti barangay.
Nupay kasta, agtultuloy pay laeng ti imbestigasyon mainaig ti motibo iti krimen.
Immunan nga inrakurak ni Tayaban a tallon a rabii nga adda dagiti agsisiim iti nasao a lugar sakbay ti pammaltog.
Narekobre dagiti otoridad ti maysa a kalibre 45 a paltog ken iti kabigatan ket nakaala ti SOCO iti 13 a kapsula ti caliber M16 a paltog.
