LAOAG CITY – Inpetteng ni Mr. Romel Pascua, direktor ti Lamina Productions ken nangbukel ti Aweng a maysa a Documentary film iti kompetisyon ti Tan-ok Film Festival a dagiti bida a mannalon iti Zanjera Macupit iti ili ti Bacarra ken Zanjera Sallagid iti ili ti Piddig dagiti pudno a nagballigi iti kompetisyon.
Segun ken ni Pascua, dagiti mannalon ti adda iti likudan ti pannakagun-od ti grupo da iti nagduduma a pammadayaw iti kalepleppas a film festival.
Immuna iti daytoy, kuna ni Pascua a ti documentary film nga Aweng ket nakaitampokan ti pudno nga istorya dagiti mannalon.
Inbatad na nga amin a napinpintas nga adal ken importansya ti panagkikinnamayet ket naipabuya iti publiko babaen iti nasao a pelikula.
Kabayatanna, kuna ti direktor a saan nga agballigi ti nasao a pelikula nu awan ti tulong ti gobierno probinsyal nga isu pay ti nangipaay ti 30,000 a pisos a tulong para iti pannakabukel daytoy.
Mainaig iti daytoy, inbunannag ni Pascua a gapu iti in-inot a pannakaiyam-ammo iti publiko dagiti pelikula nga aramid dagiti ilokano ket maal-allukoy dagiti agtutubo a mangadal ken mangayat ti film making.
Naamoan nga uppat a documentary film ti nagbibinnalubal iti film festival ken ti Aweng ket nakaiyawid ti nagduduma nga award kas iti Best Scoring, Best Director, Best in Cinematography ken Best picture.
