LAOAG CITY – Gutgutiguten ni Engr. Maria Teresa Bacnat, Officer In-charge ti Provincial Agriculture Office dagiti mannalon ditoy probinsia nga agmula ti High Value Crops wenno HVC.
Inlawlawagna a naipagagangayen ditoy probinsia nga iti tunggal panawen ti panagtutudo ket pagay ti mula dagiti mannalon.
Nupay kasta, inpalagipna nga iti agdama a panawen ket saanen a masinunuo no kaano nga agtudo.
Mainaig iti daytoy, inlungalongna ti panangpadas dagiti mannalon nga agmula ti High Value Crops.
Inbunannagna a kas iti inkari ni Gob. Matthew Marcos Manotoc ket sindadaan ti gobierno probinsial a mangipaay ti naan-anay a suporta kadagiti mannalon ditoy probinsia nga agmula ti High Value Crops.
Pinasingkedanna a nakasagana ti probinsia a mangipaay manipud kadagiti bin-i a bukbukel, abono, irigasyon ken fuel subsidy.
Inbatadna a masapul laeng ti panagpailista dagiti mannalon iti agriculture office iti bukudda a lugar kangrunaanna iti kalikagum dagitoy nga imula ken no kasano ti kalawa ti mulaan dagitoy.
Kunana nga apaman a maipadanon ti nasao a listaan iti Provincial Agriculture Office ket maipaay daytoy kadagiti maseknan a mannalon.
Innayon ni Bacnat a kalikagum ti gobernador a baliwan dagiti mannalon ti imula dagitoy gapu ta mamati a dakdakkel ti mapastrek dagitoy babaen iti panagmulada ti High Value Crops.
