LAOAG CITY – Inbatad ti Malacañang a saan nga ammo ni Presidente Ferdinand “Bongbong” Marcos Jr. dagiti inrakurak ni dati a sekretario ti Department of Public Works and Highways (DPWH) a ni Manuel Bonoan maipapan iti mapapati a ₱24 billion a “leadership fund” a dati a naipaay kadagiti senador.
Kinuna ni Castro a nalimed no dadduma dagiti kakastoy a katulagan.
Innayon ti opisial a saan pay nga ammo ni agdama a sekretario ti DPWH a ni Vince Dizon ti dati a nailatang a pondo.
Iti testimonia-na iti sango ti Sandiganbayan idi Mierkoles, kinuna ni Bonoan nga adda “leadership fund” ti DPWH a nailatang kadagiti senador a mangirekomendar iti listaan dagiti proyekto.
Segun iti dati a sekretario, naipadamag nga aggatad iti ₱500 milion ti alokasion para iti tunggal senador, idinto a dumanon iti ₱1 bilion ti pondo para kadagiti senador nga addaan iti committee chairmanship.
Sumagmamano a senador ti naglibak iti alegasion ni Bonoan, a karaman kadagiti sumangsango iti kaso a mainaig iti maipagarup nga anomalous use of flood control funds.
Kinuna pay ni Castro a saanen nga awagan ni Marcos ti internal investigation iti makunkuna a “leadership fund” gapu ta addan iti ima ti Sandiganbayan ti kaso.
Innayon ti opisial nga awan ti kastoy a pondo a nairaman iti naisingasing a 2027 national budget ti DPWH iti babaen ken ni Dizon.
