LAOAG CITY – Inbatad ni Mr. John Rey Salud, presidente ti North Main Canal nga adda ti napintas nga epekto ti plano ti Department of Agriculture a mapagbalin nga hybrid rice seed ti mula dagiti amin a mannalon.
Nu pay kasta, kuna na a ti panagmula ti hybrid rice seed ket agdepende iti sitwasyon ti daga a pagmulaan gapu ta kasapulan pay ti naan-anay a padanom iti panagpatanur iti daytoy.
Mainaig iti daytoy, inbatad ni Salud a tapno magun-od ti panagballigi ti plano ti Department of Agriculture ket masapol a maipadal kadagiti mannalon dagiti proseso ken usto a proseso iti panagmula ti hybrid rice seed.
Inbunannag na a nasayaat nu marugyan ti demonstration ti panagmula kadagiti mannalon tapno saan a masayang dagiti maibunong a bunobon ken awan ti maapektaran nga apit.
Immuna iti daytoy, inpakaammo ni Salud nga iti gunglo da a mannalon iti paset ti Vintar ken Bacarra ket addan dagiti nagmula ti hybrid rice seed.
Kabayatanna, patien ni Salud nga iti agdama ket ad-ado pay laeng ti agmulmula ti inbred seed nu ikompara iti hybrid rice seed a saan a mabalin a maulit a maibunobon.
Maipalagip nga immunan nga inpakammo ti Department of Agriculture (DA) a mangbukbukel kadagiti estratehiya a mangitanduduo iti panagmula ti hybrid seeds agingga iti 1.5 million nga ektarya ti pagtalonan kabayatan ti dry season.
