LAOAG CITY – Maitultuloy iti masungad a tawen 2026 ti Mataginayon a Progreso Assistance para kadagiti Micro, Small and Medium Enterprises wenno MSME ditoy Ilocos Norte.
Inbatad ni Mrs. Elma Gabriel, mangidadaulo iti Micro, Small and Medium Enterprises Office ti Provincial Government of Ilocos Norte a daytoy ket agsipud iti naan-anay a suporta nga ipapaay da Gov. Cecilia Araneta Marcos ken ni Vice Gov. Matthew Marcos Manotoc kadagiti babassit nga agnegnegosio ditoy probinsia.
Mainaig iti daytoy, gutgutigutenna dagiti umili nangnangruna kadagiti saan pay a nakapadas a nanggundaway iti nasao a programa padasenda ti agaplikar.
Kunana a masapul ti panangsubaybay dagiti umili kadagiti programa ti gobierno probinsial kas iti nadakamat a programa.
Inlawlawagna a babaen iti daytoy ket insigida dagitoy a makaisubmitir kadagiti requirements apaman a malukatan ti panagawatda ti aplikasion.
Innayon ni Gabriel a limitado laeng dagiti mabalin a manggundaway iti nasao a programa isut gapuna a no asino dagiti umun-una a makaisubmitir kadagiti requirements ket dagitoy met laeng ti umuna a maaprobaran ti aplikasionda.
Maipalagip a manipud iti lima ribu a pisos a maipapaay a tulong pinansial kadagiti Micro, Small and Medium Enterprises iti babaen ti nasao a programa ket nagbalinen a 10 a ribu a pisos.
