LAOAG CITY – Inbutaktak ni Vice Mayor Ferdinand Ignacio iti ili ti Paoay a saan dan nga agkadwa kenni Mayor Shiela Galano ngem saan da nga agkalaban.
Inlawlawag na nga idi damo ket napintas ti relasyon da iti mayor no sadinno nga inlungalong na pay a mismo a maaddaan da ti Executive and Legislative Meeting/ Conference tapno iti pannakaisumitir dagiti aktibidad, proyekto wenno programa iti konseho ket naan-anayen a naplantsa.
Nupay kasta, kuna ni Ignacio a naperdi ti relasyon da ken ni Mayor Galano gapu ta saannan a kabaelan nga i-tolerate dagiti napasamaken ken mapaspasamak iti ili da.
Inpalgak na a kayat dagiti maseknan a no adda ti ilungalong da a programa wenno aktibidad ket aprubaran a dagus ti konseho uray saan da pay a naan-anay a naadal daytoy.
Innayon na a no maminsan ket makigkigtot da laengen gapu ta adda dagiti mailungalong a proyekto wenno programa a saan pay a saan pay a nalpas ti bid na ngem naiyimplementaren, ken no dillawen da daytoy ket makagura dagiti pasurot ti mayor.
Mainaig iti daytoy, inbutaktak ni Vice Mayor Ignacio a saan a mismo a ni Mayor Shiela Galano ti mangpatpataray iti munisipyo no di ket ti asawa na a ni dati a Mayor Jessie Galano, isut gapuna a nagulo ti lokal a gobierno iti ili ti Paoay.
Inpaganetget na a sabali ti ibagbaga ni Mayor Galano idinto a sabali met ti ar-aramiden ti asawa na.
Palawag pay ti bise mayor nga awan ti problema iti relasyon da ti mayor gapu ta nangato ti respeto da iti tunggal maysa ngem ti laeng dakkel a problema ket dagiti nakapalawlaw ken ni Galano.
Maysa kadagiti dinakamat ni Ignacio a maipagarop a makibibiang ken mangsugsugsug iti mayor ket ni dati a Konsehal Bruno Dumlao no sadinno a kinasarita na a mismon ni dati a Mayor Galano mainaig iti daytoy ngem maipagarop nga awan pulos ti inaramid nga aksyon ti maseknan.
Inpalgak pay ni Ignacio a naduktalan na pay a ni Dumlao ti adda iti likudan ti peke nga account nga agiwarwaras ti damag nga adda ti plano ti na nga agpaidasig a mayor iti ili ti Paoay.
Inpasingked ni Ignacio nga awan ti plano na nga agpaidasig a para mayor iti nadakamat nga ili isut gapuna a napalalo ti pungtot na idi maidanun kenkuana daytoy a peke a damag.
Innayon ni Ignacio a ti maysa pay a nakapungtutan na ket ti naibaga da Dumlao a nagkamali da a nangala kenkuana a bise mayor.
Inpalagip ni Ignacio a saanna pulos nga inaramid koma ti agpaidasig a para bise mayor iti ili ti Paoay no saan a nagpakpakaasi kenkuana ni dati a Mayor Jessie Galano.
Ibilang ni Ignacio a kinabastos ti ar-aramiden dagiti maseknan a kalpasan nga inpatugaw da kas bise mayor iti ili ti Paoay ket basta da lattan padisien.
Maipalagip a ni Bise mayor Ignacio ket nabayag a nagserbi kas legal counsel ni dati a Mayor Galano.
Kabayatanna, inkari ni Ignacio a matakderan na ti karina a saan pulos nga agkandidato a para mayor iti ili ti Paoay.
Pinadas ti Bombo Radyo Laoag nga alaen ti kabibiangan ni Mayor Galano ngem saan paylaeng a nagsarita gapu ta ado dagiti pakakumikuman na iti agdama.
