LAOAG CITY – Natay ti maysa a babai iti napasamak a disgrasya a nakairamanan ti dua a motorsiklo iti national highway iti Barangay Juan iti ili ti Solsona.
Segun ken ni Police Capt. Randy Damo, ti chief of police iti ili ti Solsona, kabayatan ti panagpapa-abagatan iti national highway ti motorsiklo no sadinno a lubbon ditoy ti biktima ket isu met ti ibaballasiw iti kalsada ti maysa a motorsiklo nga inturong ti maysa a menor de edad a nangitunda ti napasamak a disgrasya.
Gapu iti napasamak ket naipurwak ti biktima ken naitupar ti ulo na iti kalsada.
Naitaray ti biktima iti kaasitgan nga ospital ngem saanen a nasalbar dagiti doctor ti biagna.
Inpakaammo ni Police Capt. Damo nga addan ti inisyal a panagsasarita ti pamilya ti menor de edad ken ti pamilya ti biktima ngem saan da pay a nakapagtulag a nasayaat no ania dagiti rebbeng a maaramid aglalo ket agkakabagyan metlaeng dagitoy.
Kabayatanna, inpasingked ni Damo a naiget ti panagsita da kadagiti menor de edad nga agmanmaneho ti motorsiklo ken aniaman ti klase na a behikulo ngem aminadao ti opisyal a saan da amin a mabantayan dagiti lugar iti ili ti Solsona.
Innayon na a malaksid kadagiti opisyal ti barangay ket katulungan da pay dagiti mangisursuro kadagiti pagadalan iti nasao nga ili tapno kanayaun a mapalagipan dagiti estudyante a saan da nga agmaneho, ngem saan da metten mabantayan dagitoy no adda dan iti ruwar.
