LAOAG CITY – Natay ti maysa a barito kalpasan a naaksidente iti Brgy. Lacuben iti ili ti Badoc idi Enero 1, 2025 agarup alas-sais ti rabii.
Segun iti Badoc Police Station, ti nagmaneho ti Honda XRM ket agtawen ti 18, baro, tubo manipud iti of Brgy. Del Carmen Uzon Masbate ken agdama nga agnanaed iti Brgy. Camestizoan, Sto. Domingo, Ilocos Sur idinto a ti nagmaneho ti Hilux ket agtawen ti 64, naasawaan ken residente iti Brgy. Lacuben iti ili ti Badoc ken ti nagmaneho ti Toyota Wigo ket agtawen ti 60 ken residente idiay Tuguegarao City.
Basar iti imbestigasion, agturtruong iti timog ti motorsiklo idi kellaat daytoy a limmiko pakannawan a direksion rason a nadungpar na ti Toyata Hilux a kapanpanaw na iti pagtaengan na iti laud a paset ti national highway.
Gapu iti napigsa nga impact, naipurwak ti driver ti motorsiklo iti tengga ti kalsada, ken nadungpar ti sumumgad a Toyota Wigo iti bangir a linya.
Mainaig iti daytoy, naggapo iti birthday party iti ili ti Currimao sakbay a napasamak ti insidente.
Gapu iti daytoy, dagos a naitaray ti driver ti motorsiklo iti Karmelli Hospital idinto a naiyakar iti Corpuz Clinic and Hospital Sinait iti probinsia ti Ilocos Sur.
Nupay kasta naideklara a dead-on-arrival ti driver ti motorsiklo babaen iti attending physician a ni Dr. Allan Bumanglag idinto a saan naanano ti driver ti Wigo ken Hilux.
