LAOAG CITY – Agpokus ti House Committee on Justice iti panagadu ti kinabaknang ken Statements of Assets Liabilities and Net Worth (SALN) ni Vice President Sara Duterte inton sumaruno a panagdengngeg iti impeachment inton Abril 22.
Iti panagdengngeg, naiprisentar ti notary public, dagiti pannakabagi ken rekord ti Commission on Audit (COA), Kamara, Philippine Statistics Authority (PSA) ken National Bureau of Investigation (NBI).
Karaman kadagiti kitkitaen ti Justice panel ket dagiti detalyado nga accounts ti self-confessed bagman a ni Ramil Madriaga iti koneksion daytoy kadagiti Duterte, ti findings ti National Bureau of Investigation a dagiti acknowledgement receipts iti confidential funds ket insurat ti maymaysa laeng a tao; notice of disallowance ti Commission on Audit (COA) iti Office of the Vice President (OVP) manipud 2022 agingga 2023; report ti Philippine Statistics Authority kadagiti maipagarup a nagan kadagiti benepisiario ti confidential funds nga awan ti rekord ti pannakaiyanak, pannakatay ken ti panagkasar.
Basar iti reklamo iti impeachment, ni Vice President Duterte ket inakusaran a nagdeposito ti P111 milyon kadagiti nagduduma a bangko idiay Davao City ken Metro Manila manipud 2006 agingga 2015 a maipagarup a tugma iti sueldo daytoy kas Vice Mayor ken Mayor ti Davao City.
Nadakamat a ti baknang ni Vice President Duterte ket ngimmato manipud P13.8 milyon idi 2007 iti P44.8 milyon idi 2017 iti baet ti P2 milyon laeng ti sueldo daytoy.
