LAOAG CITY – Natay ti maysa a barito apaman a rumrumuar a nakuryente iti fuse box iti maysa nga abandonado a beach resort.
Segun ken ni Pmaj Lester Dabbay, ti biktima ket agtawen ti 21, maysa a mangngalap ken idinto a ti kaduana ket agtawen 23, maysa a mangngalap no sadinno ket agapada dagitoy a residente ti brgy Balaoi iti ili ti Pagudpud.
Iti inisial nga imbestigasion dagiti otoridad, rumrumuar nga agturong nga agkalap dagiti dua a lallaki iti pasado alas-8 ti rabii idi kellaat nga ikiddaw ti biktima nga mapan iti paset ti abandonado a beach resort.
Kuna ti hepe nga inkiddaw ti biktima iti kaduana a napan nagkalap nga aguray lattan iti ruar ngem saanna a dinakamat no ania ti rantaenna.
Kalpasan ti sumagmamano a minutos ket ditoy a nariparna nga adda ti kellaat a nagrisat a rason no apay a napanna kinita ti kaduana ket ditoy a nakitana ti biktiman a nakadasay.
Insigida nga nagkiddaw daytoy ti tulong kadagiti otoridad ket apaman a naikabil daytoy iti balay pagagasan ket ditoy a naideklarar a dead on arrival.
Impakaammo ti hepe a datin nga agturturong ti biktima iti abandonado a beach resort tapno aggatang kadagiti galba, ngem saan a masinunuo dagiti ottoridad nu ania ti napanna rinanta iti nasao a lugar iti alas-8 ti rabii.
Kabayatanna, inbatadna nga agtultuloy ti isaysayangkatda nga imbestigasion.
