LAOAG CITY – Inreklamo dagiti consumers iti maysa a dakkel a grocery store ditoy ciudad ti Laoag gapo iti  kaawan ti price tag dagiti nagduduma a lako.

Namunganay daytoy a banag kalpasan a naripar dagiti sumagmamano a consumers a mapan kuma gumatang ti mantika iti nasao a grocery store ngem awan ti nakaikabil wenno nakapaskil a price tag na.

Gapu iti daytoy, mamati ti concern citizen a panangallilaw daytoy a wagas kadagiti mapan aggatang gapu ta saan a maamoan dagiti consumers no mano ti presyo dagiti produkto a mailaklako.

Malaksid iti daytoy, naamoan pay manipod iti concern citizen nga adda dagiti sumagmamano a produkto a mailaklako iti nadakamat a grocery store a saan nga umiso dagiti naikabil a price tag.

Daytoy ket gapo ta basar iti kapadasan na ket 177.50 pesos ti nakapaskil a presyo ti maysa a palaman ngem idi agbayaden ken makita na ti resibo ket agbalor daytoy iti 189.50 pesos.

Kabayatanna, inbatad ni Mr. Dominador Alberto, OIC ti Consumer Protection Division iti Department of Trade and Industry (DTI) ditoy probinsya a dagus da a napan iti naireklamo a pagtagilakoan nga awan ti presyo dagiti lako na.Segun kenni Alberto, naduktalan ti grupo na a ti mantika a naireklamo ket kadis-display laeng ken saan pay a naipan ti presyo na.

Inlawlawag na a binalakadan na ti manimatmaton ti pasdek ken dagus met laeng a naipan ti presyo kalpasan a naamoan ti management ti establishimento a mairekreklamo daytoy.

Kabayatanna, kuna ni Alberto a mailabsing iti RA No. 71 wenno Price Tag Law ti saan a panangipan ti presyo dagiti produkto iti laksid nga adda ti warning.

Inpetteng na a maminsan laeng a warning ti ipaay da kadagiti aglabsing a pasdek ken no saan a sumurot iti pagalagadan ket mangisyu da ti Notice of Violation.

Kinumpirmaran na nga iti panagsursursur da kadagiti pagtagilakoan ket adda dagiti awan ti presyo na a produkto ken saan nga umno ti presyo na ket dagus da met a balakadan dagiti mangimatmaton.

Mainaig iti daytoy, kunana a ditoy Ilocos Norte ken kabayatan ti pandemya, awan met pay ti napatawan ti pannusa wenno naaiyaplikaran ti linteg.