LAOAG CITY – Nadiskobre dagiti sumagmamano a residente iti Brgy. Gayamat iti ili ti Piddig ti maysa a granada.
Daytoy ket nakitada apaman ti panagkalida ti pagtaengan ti maysa a lalaki nga agtawen ti 56, addaan ti asawa, mannalon ken residente ti isu met laeng a lugar.
Inpakaammo ni P/Maj. Joseph Bantullay ti Chief of Police ti Philippine National Police Piddig a daytoy ket nakita dagiti residente nga insigida met nga in-report da ti kuerpo ti kapulisan.
Innayonna a dakkel ti tiansana daytoy a bomtak uray pay aglatlati no sadinno a mangipasimudaag a nabayag daytoyen.
Kabayatanna, pinadawayan ni Bantullay dagiti residente gapu ti insigida a panag-report da no sadinno a kunana a no adda ti kakastoy a banag a saan a pamiliar ket agkiddaw laeng ti tulong tapno maliklikan ti posible a risgo ti biag.
