LAOAG CITY – Nagsagaba ti sugat iti ulo ti maysa a lakay kalpasan ti napasamak a desgrasya iti paset ti Barangay Cavit ditoy ciudad ti Laoag partikular iti sango ti pagtaengan ni Barangay Chairman Jerry Alonzo.
Binigbig ni Alonzo ti biktima a ni Junior Bumanglag a residente iti Barangay Araniw ditoy met laeng ciudad ti Laoag idinto a ti nakadungpar ket ni dati a barangay chairman Serafin Acierto iti Barangay Gabu Norte ditoy ciudad.
Segun kenni Alonzo, bayat nga adda da iti barangay hall ket adda ti nangipakammo kenkuana nga adda ti napasamak a desgrasya isut gapo na a dagus da a napan iti lugar kadwa na dagiti tanod.
Kunana a basar iti barito a nakakita iti desgrasya ket agpada nga agpadaya a direksyon ti kurong-kurong a nagluganan ti biktima ken ti Innova.
Nupay kasta, maipagarop nga immortake ti innova ken nadungpar na ti kurong-kurong ken nadalapos pay ti maysa a behikulo a nakaparking iti igid ti kalsada.
Gapo iti daytoy, natulid ti lakay ken nagsagaba ti sugat iti ulo na, ken dagus a tinulungan ti barangay tanod nga inlugan ti biktima.
Kalpasan ti sumagmamano a minutos ket simmangpet ti ambulansya ken naitaray iti ospital ti biktima ken adda ti puot na bayat a maitartaray iti balay pagagasan.
