LAOAG CITY – Nalmes ti maysa a lalaki iti paset ti Bolo River iti ili ti Dumalneg.
Binigbig ni P/Cpt Junjun Medina, hepe ti Philippine National Police iti nadakamat nga ili ti biktima a ni Orlando Suniga, agtawen ti 51, residente iti Brgy. Bacsil iti ili ti Bangui.
Basar iti imbestigasion dagiti otoridad, nagturong ti pamilia ni Suniga iti Bolo River tapnu agpi-picnic, maysa a tourist attraction iti ili ti Dumalneg.
Segun ken ni Brgy. Kagawad Rogelio Balalio Jr. binagaanna ti biktima nga agusar iti life vest kas security ken standard procedure ngem maipagarup a nagkedked ti biktima a mnagisuot iti daytoy.
Mainaig iti daytoy, naammoan a nagiinom dagitoy kaduana dagiti kabagianna idinto a napan a timmapug ti biktima iti karayan no sadinno saandan a nakita nga immahon.
Gapu iti daytoy, nangiwayat ti search and rescue operation iti nadakamat a karayan babaen ti tulong dagiti lokal nga umili, kalpasan ti agarup 30 a minuto ket narekobreda ti biktima ken dagus nga inyuswatda ti Cardiopulmonary Resuscitation (CPR).
Kabayatanna, dagus a naitaray ti biktima iti Bangui District Hospital, ngem indeklara a dead on arrival babaen ti attending doctor a ni Dra. Fatima Sales.
