LAOAG CITY – Nagdinnungpar ti maysa a pickup ken motorsiklo iti paset ti Brgy. 4 ditoy Siudad ti Laoag.
Segun ken ni Police Staff Sergeant Mark Briones ti Duty Desk Officer ti Philippine National Police Laoag Traffic Division, bayat a dumaldalyasat ti nakamotorsiko nga agpaabagatan ket dita a maipagarup a kellaat a dimmungpar ti nangiturong ti L200 Mitsubishi pick up.
Gapu iti daytoy, kunana nga arig ket nawarwara ti partes ti motorsiklo gapu iti kapigsa ti impact ti napasamak a desgrasia idinto a nadadael ti akinkannigid a sango a parte ti pick up.
Inlawlawagna a timmayok ti driver ti motorsiklo idi nadungpar daytoy ti pick up a rason a naawanan daytoy ti puot gapu iti pannakaitupa ti ulo ken panagsagabana ti sugat iti nagdumaduma a paset ti bagina.
Inbatadna a dagus met a naitaray iti Governor Roque Ablan Senior Memorial Hospital ti biktima para iti naan-anay a pannakatamingna.
Mainaig iti daytoy, basar kadagiti kabagian ti biktima ket adda ti impluwensiya ti nasanger ti driver ti motorsiklo idinto a saan met a masinunuo pay no nabartek ti nangiturong ti pick-up.
Kabayatanna, iti agdama ket awan pay ti panagsasarita iti agsinnungbangir a partido.
