LAOAG CITY – Natay ti maysa a lalaki kalpasan a na-stroke idiay Brgy. Aring, Badoc, Ilocos Norte.
Nabigbig ti biktima a ni Cesar Anteola y Gamiy, agtawen ti 50, awanan ti asawa ken residente iti nasao a lugar.
Immuna iti daytoy, mapan kuma dagasen ni Fredelito Tabuyo, agtawen ti 37, naasawaan, mangalap ken residente iti nasao a lugar ti biktima ngem nakarikep ti ridaw ti balay na.
Kalpasan daytoy ket nagtuktok iti ridaw ngem awan ti nangilukat ken nadlaw na a naka-on ti telebisyon isut gapo na a simmirip iti tawa ket ditoy a nakita na ti biktima a nakaidda.
Dagus a nagpatulong ni Tabuyo kadagiti karruba da ken insigida met a nagresponde dagiti kameng ti PNP-Badoc.
Naitaray ti biktima iti Rural Health Unit (RHU) iti nasao nga ili ngem naideklara a natayen babaen kenni Dr. Edgar Cabading.
Rumrumwar a ti rason ti nakatayan ti biktima ket gapo ti pannaka-atake wenno hypertension.
Kabayatanna, awan met ti makita ti PNP nga ebidensya nga adda ti foul play na ti nasapamak.
