LAOAG CITY – Natay ti maysa a lalaki kalpasan a nalmes iti Bislak river iti Barangay Tambidao iti ili ti Bacarra.
Nabigbig ti biktima a ni Victor Viernes, agtawen ti 42, awanan ti asawa ken residente iti Brgy. Cabaruan iti metlaeng nadakamat nga ili.
Basar iti report, nagresponde a dagus dagiti kameng ti Bureau of Fire Protection ken ti Emergency Medical Services Team kalpasan a nakaawat da ti report nga adda ti nalmes a lalaki iti nadakamat a karayan.
Apaman a nakadanun ti grupo iti lugar ket inwayatan da a dagus ti Manual Cardiopulmonary Resuscitation (CPR) ken ti Automatic Chest Compressor iti namnama da a masalbar da pay ti biag ti biktima, kalpasan na ket intaray da iti Bacarra Medical Center ngem naideklarar a dead on arrival.
Naamoan manipod kadagiti tattao iti lugar a sakbay ti insidente ket nakita nga agin-inom ti nasanger ti biktima.
