LAOAG CITY – Nasugatan ti maysa a mannalon kalpasan a napaltogan iti Sitio Sucoc, Barangay Caraitan iti ili ti Badoc.
Binigbig ni Police Major Joseph Tayaban, chief of police ti PNP-Badoc ti biktima a ni Richard ken residente iti nasao a lugar.
Segun kenni Tayaban, apaman a naawat da ti report ket dagus da a nagturong iti nakapasamakan ti pammaltog ken ditoy a nakita da ti biktima ken dagus a naitaray iti ospital ken iti agdama ket addan iti natalged a kasasaad.
Inbatad na nga iti nakapasamakan ti krimen ket nakarekobre da ti maysa a kalibre 45 a paltog idi rabii ken itay bigat ket nakaala ti SOCO ti 13 empty shell ti caliber M16 a paltog.
Mainaig iti daytoy, kuna ni Tayaban a tallo a rabii sakbay ti napasamak ket kanayon nga agtataol dagiti aso ken idi laeng rabii no sadinno a napan na kinita ti nuang na ket ditoy a napaltogan.
Kabayatanna, agtultuloy met ti panagimbestigar da iti napasamak a pammaltog ken no anya ti motibo daytoy.
Immapela ni Tayaban a no adda ti nakakita iti pammaltog a makitinnulong kuma iti PNP para iti pannakasolbar daytoy.
