LAOAG CITY – Dead on arrival iti Governor Roque Ablan Senior Memorial Hospital (GRASMH) ti maysa a lalaki kalpasan a nadesgrasya iti paset ti Barangay Balacad ditoy ciudad ti Laoag.
Nabigbig ti biktima a ni Gerald Domingo Gatcho, agtawen ti 28, residente, baro, iti Brgy. Malitatao, Claveria, Cagayan.
Iti imbestigasyon dagiti otoridad, kabayatan ti panagpapa-abagatan iti Laoag-Paoay Road ti biktima a nakamotorsiklo idi ta nakadinnungpar na ti maysa nga Hyundai Santa Fe nga agmaris puraw nga inturong ni Mary Jane Pascual y Musni, agtawen ti 43, naasawaan, negosyante ken residente iti Brgy 12, Magat Salamat ditoy ciudad ti Laoag.
Rumrummuar nga agpalaud koma ni Pascual iti Federico Fariñas Street idi napasamak ti aksidente.
Insigida a naitaray iti GRASMH ti biktima ngem naideklara a pimmusayen.
Naamoan nga awan ti maipila a reklamo gapu ta immanugot ti pamilya ti biktima a nakiareglo ken ni Pascual.
Kabayatanna, kinumpirmaran ni Patrolman Joel Agoy a naiyawiden ti bangkay ni Gatcho idiay Cagayan.
